ഫരീദാബാദ്: അമിത വേഗത്തിലെത്തിയ മേഴ്സിഡസ് ബെൻസ് ബൈക്കിലിടിച്ച് ഫുഡ് ഡെലിവറി ഏജന്റിന് ദാരുണാന്ത്യം. ചൊവ്വാഴ്ച പുലര്ച്ചെ രണ്ട് മണിക്ക് ഫരീദാബാദിലാണ് സംഭവം. 28കാരനായ ആനന്ദ് രാജ് ബിന്ദ് ആണ് മരിച്ചത്. ആനന്ദിന്റെ മോട്ടോര് സൈക്കിളിന്റെ പിന്നിലാണ് കാര് ഇടിച്ചത്. സംഭവത്തിന് പിന്നാലെ കാര് ഡ്രൈവര് കടന്നുകളഞ്ഞു. യുപിയിലെ മിര്സാപൂര് സ്വദേശിയാണ് മരിച്ച ആനന്ദ്.
കഴിഞ്ഞ അഞ്ച് വര്ഷമായി ചാന്ദിലാ ചൗക്കിലെ ഭട്ടോല ഗ്രാമത്തിലുള്ള വാടക വീട്ടിലാണ് ആനന്ദ് താമസിച്ചിരുന്നത്. സോമാറ്റോ ഡെലിവറി ഏജന്റായ ആനന്ദ് ഫുഡ് ഡെലിവറിക്കായി പോകുമ്പോള് സെക്ടര് 15ലെ ഫയര് ബ്രിഗേഡിന് മുന്നില് വച്ചാണ് അപകടമുണ്ടായത്. കാര് അമിതവേഗതയില് വന്ന് ആനന്ദിന്റെ വണ്ടിയില് ഇടിച്ചതിന് പിന്നാലെ ആനന്ദും ഒപ്പം ബൈക്കും ദൂരേക്ക് തെറിച്ച് വീണിരുന്നു.
ഉടന് തന്നെ ആനന്ദിനെ ഡല്ഹിയിലുള്ള സ്വകാര്യ ആശുപത്രിയില് എത്തിച്ചെങ്കിലും ചികിത്സയിലിരിക്കെ മരണം സംഭവിക്കുകയായിരുന്നു. എയര്പോര്ട്ടില് നിന്നും ആരെയോ കൊണ്ടുപോകാനായി വന്ന കാറാണ് അപകടത്തില്പ്പെട്ടത്. ഇത് ഏതോ കമ്പനിയുടെ പേരിലാണെന്നാണ് റിപ്പോര്ട്ട്.
Content Highlights: A food delivery agent was killed after a speeding Mercedes car rammed into his bike